Welkom by Primêre Meisieskool Oranje

Hartlik welkom by die Christelik en Nasionale Primêre Meisieskool Oranje! Ons is ʼn trotse skool met ʼn trotse tradisie en soos een groot familie waar elke dogter vir ons baie spesiaal is. Dit is die begin van ʼn wonderlike fase in jou lewe!

Dit is ons strewe om hier, by die primêre skool, geleenthede vir ons dogters te skep en te belê in ʼn leerruimte waarin hulle veilig kan voel en met vertoue kan ontwikkel tot hul volle potensiaal. Soos in Pres. M.T. Steyn, stigter van ons skool, se woorde, gee ons die dogters: “Godsdiens, eerbied en geloof in die goeie, die edele en die heilige en sy staan so vas soos ʼn rots. Sy sal, as die geleentheid hom voordoen, ʼn heldin word.”

Visie & Missie

Die visie van C & N Primêre Meisieskool Oranje is om elke dogter met liefde en die regte waardes en norme te ontwikkel as ʼn selfstandige, bekwame jong vroue wat in staat is om gelukkige, vervulde lewens te lei, sodat hulle ʼn besondere bydrae kan maak – nie net in Suid-Afrika nie, maar ook in die wye wêreld. Die C & N Primêre Meisieskool Oranje is verbind tot uitmuntende, rigtinggewende opvoeding op akademiese-, sport- en kultuurgebied, sodat die leerlinge ʼn onmisbare bydrae tot die lewe kan maak met kennis, uitmuntende vaardighede en die sensitiwiteit van ʼn Christelike benadering.

Stel u belang daarin om u kind in die skool te hê?